Արձակուրդային փորձառութիւն. մաս Ա.

Դպրոցասէր վարժարան,
9-րդ դասարան

Էդուարդ Խաչատրեան

Լուրտ

Ամրան արձակուրդին, ես գացի Ֆրանսայի հարաւը՝ Վալրաս Փլաժ քաղաքը, 10 օր անցընելու ծովեզերքը։ 10 օր ետք, առաջին անգամ ըլլալով այցելեցի Լուրտ քաղաքը։

Իսկապէս գեղեցիկ վայր էր եւ լեցուն էր քրիստոնէական ոգիով եւ պատմութեամբ։ Լուրտ քաղաքը կը գտնուի Ֆրանսայի հարաւ-արեւմուտքը։ Հոնտեղ ամէն տարի մօտ 2.5 միլիոն Քրիստոնեայ կ’երթայ ուխտագնացութեան, աղօթելու, Աստուծմէ բժշկութիւն եւ հրաշքներ խնդրելու։

Շատ սիրեցի քաղաքի տեսքը, իր փոքրիկ փողոցներով, որոնք վեր ու վար կ’ընէին, եւ գետի երկայնքին հիւրանոցներով լեցուն երկար փողոցը։ Բայց, ի հարկէ, ամենաշատը ինծի դուր եկաւ սրբավայրը իր տարբեր նշանաւոր վայրերով, որոնք կարելի է այցելել:

Պատմութիւնը կ’ըսէ, որ օր մը երիտասարդ Պերնատէթը իր քոյրերուն հետ փայտ հաւաքելու ատեն յանկարծ կը տեսնէ պայծառ լոյս մը, որ կը խօսի իրեն հետ։ Ոչ ոք կը հաւատայ իրեն։ Լոյսը մի քանի անգամ յայտնուելէ ետք կ’ըսէ, որ իր անունը Անարատ Յղութիւն է։ Այդ պահէն ետք մարդիկ կը հաւատան, որ ան Մարիամ Աստուածածինն է: Պերնատէթ միակն է, որ կը տեսնէ եւ կը խօսի իրեն հետ 19-ը անգամ։ Մարիամ Աստուածածինը կ’ըսէ, որ այնտեղ եկեղեցի կառուցեն եւ մարդիկ գան քարայրի ջուրէն խմեն եւ լուացուին։

Ես տեսայ նաեւ Պերնատեթի հայրական տունը: Լսողական սարքի (audioguide) օգնութեամբ այցելեցի մոմէ թանգարանը, ուր կային Պերնատեթի պատմութեան մասին մի քանի տեսարաններ, պահեր Յիսուսի կեանքէն։ Շատ հետաքրքրական էր։  

Մի քանի անգամ գացի քարայրը, գիշերային ջահերով երթը շատ տպաւորիչ էր։ Ցաւօք, ես մնացի ընդամէնը 2 օր, բայց վերադարձայ տպաւորուած եւ լաւ յիշատակներով։

7 Սեպտեմբեր 2023

---

Նայիրի Շահինեան

Նիս եւ Հայաստան

Այս արձակուրդին մէկ ամիս Նիս գացի: Շատ տաք էր։ Երբ հոն էի, բոլոր օրերս լողաւազանին մէջ կ’անցընէի: Լաւ էր, որովհետեւ իմ ամբողջ ընտանիքիս հետ էի:

Կարգ մը օրեր ծով կ’երթայինք.  շատ ալիք կար: Եղանակը տաք էր: Երբեմն ալ հայրիկիս կ’օգնէի:

Երբ Փարիզ դարձայ, երկու օր ետք Սիլվան տեսայ չինական թաղամասը, միասին լաւ ժամանակ անցուցինք: Յետոյ, տուն հասնելով ճամպրուկս պատրաստեցի մեկնելու համար Հայաստան, որ կարօտով կը սպասէի։

31 Յուլիսին ընտանեօք Air France-ով ու մեծ ուրախութեամբ Երեւան մեկնեցանք։ Մեծ ծնողներուս տունը մնացինք, մեծ տուն էր պտղատու ծառերով, պարտէզին մէջ կային թուզ, Նուռ, հոն, տանձ, խաղող, եւայլն, որ ամէն առաւօտ կը քաղէինք։ Հոն ալ շատ տաք էր։ Քիչ մը հանգստանալէ ու տեղաւորուելէ ետք, մեր պտոյտները սկսան դէպի Արտաշաւան, Դիլիճան, Ապարան, Աշտարակ,  ինչպէս նաեւ այցելեցինք եկեղեցիներ:

Մեր տան մօտ կը գտնուի Յաղթանակի այգին, որ բազմաթիւ անգամներ այցելեցի: Ներկայ գտնուեցայ հայկական պարի համոյթի ներկայացումին, ինչ որ շատ մեծ հաճոյք պատճառեց։ Ունեցանք շատ հիւրեր ու հաճելի օրեր անցուցինք։

 Ընդհանուր առմամբ անմոռանալի արձակուրդ անցուցի։ Յոյսով եմ, որ նորէն առիթ կ’ունենամ մեկնելու հայրենիք:

7 Սեպտեմբեր 2023