Դպրոցասէր վարժարան, 8-րդ դասարան
Հիւկօ Գարասօ
Կիրակի, 22 Դեկտեմբերին, իմ մօրս եւ մեծ մօրս հետ գացի Վիլիէ-լը-Պել պանդոկ մը, ուր որ օտարական աղքատներ կը բնակին։ Անոնց տարինք հագուստներ, կօշիկներ եւ ուտելիք։ Ես հոն տեսայ տարիքոտ մարդիկ, կիներ եւ երեխաներ, որոնք կ’ապրէին աղքատութեան մէջ։
Երբ մեծնամ կ’ուզեմ իրենց աւելի օգնել, որովհետեւ ես քիչ մը տխուր կ’ըլլամ, երբ կը տեսնեմ մարդիկ աղքատութեան մէջ։ Ես ինծի կ’ըսեմ, որ անարդար է այն, որ ոմանք չեն յարգեր այսպիսի մարդիկ։
Լենա Թելֆէեան
Հինգշաբթի, 2 Յունուարին Հոլանտա էի։ Մեծ մօրս եւ քրոջս հետ գացի ծերանոց։ Միասին նստեցանք եւ պատրաստեցինք ծաղիկներ եւ քարտէսներ։ Քարտէսներուն վրայ քրոջս ես իմ անունս գրեցի եւ պզտիկ նկարներ փակցուցի ու զարդարեցի։ Յետոյ զանոնք կապեցի ծաղիկներուն եւ բոլորին տուինք, որովհետեւ վերջին անգամ կը տեսնեմ զիրենք։
Ամբողջ ծերանոցը շատ ուրախացաւ։
Ալէք Տեկիրմենթաս
Արձակուրդի ատեն, մեր եկեղեցիին մէջ գործող բարեսիրական ծառայութեան օգտակար դարձայ դրամ տալով։ Նպատակն է օգնել Հայաստանի Աղաւնավանք, Զօրավանք եւ Խաչարձան (Տաւուշի մարզ) գիւղերու ընտանիքներուն եւ մանուկներուն։ Մեր պատուելին Հայաստան իր յաջորդ այցելութեան ընթացքին պիտի գնէ զանազան նուէրներ եւ պիտի բաժնէ այնտեղ գտնուող մանուկներուն:
Մասնակցեցայ նաեւ «Նորմանտի» հանգանակութեան ընկերակցութեան մը, որուն տուի գործածուած հագուստներ եւ առարկաներ:
Նարինէ Ապելեան
Այս արձակուրդին ես եւ ընտանիքս օգնեցինք Resto du coeur- ին, կազմակերպութիւն մը, որ կ’օգնէ այն մարդոց, որոնք հագուստի կարիք ունին։ Մենք տուինք հագուստներ, խաղալիքներ եւ քաղցրեղէն, քանի որ մայրս կամաւոր կ’աշխատի հոն, անոր համար ընտրեցինք Resto du coeur-ը։
Ուրիշ օգնութիւն մըն ալ ըրինք զարմիկներով, որ մօրաքոյրս նուիրեց իր գործատեղիին միջոցով։
Սոֆի Կրեկորով
8 Յունուար 2025-ին ես գացի Փարիզ մօրս եւ քրոջս հետ, որ միասին պտտինք։ Գացինք եկեղեցի մը տեսնելու։ Անկէ քիչ մը հեռու երկու ծեր եւ հիւանդ մարդ կային, որոնք իրենց ձեռքերով շատ սիրուն թեւնոցներ կը գործէին։ Աս մարդոցմէ մէկը մէկ ձեռք չունէր, բայց նորէն ալ շատ գեղեցիկ բաներ կ’ընէր։ Ես փորձեցի իրենց օգնել։ Անոնցմէ մէկուն հետ խօսեցայ եւ ըսաւ, որ կրնայ ինծի սորվեցնել թեւնոց գործել, բայց շատ դժուար բան էր։ Ուրեմն, օգնեցի իրենց թել բերելով, դրամը հաշուելով, թեւնոցները իրարու կապելով …
Յետոյ հարցուցի, թէ ինչո՞ւ թեւնոց կը ծախեն Փարիզ այս ցուրտին։ Ըսին որ երբ հիւանդանոց էին, իրենց գործել սորվեցուցին եւ հիմա կ’ուզէին դրամ շահիլ, անոր համար եկած էին Փարիզ։ Ըսին նաեւ, որ արդէն 6 անիս է, որ այսպէս կ’աշխատին։
Յետոյ, ես եւ քոյրս իրենց գործերէն գնեցինք եւ ուրախացանք, որովհետեւ մեզի ըսին. «Նորէն կու գաք երբ ուզէք»։
Ռաֆֆի Գարա
Որպէս լաւ գործ, մօրս աշխատատեղիին՝ Assurance Maladie-ի գրասենեակին հին խաղալիքներ տուի, քանի որ բարեսիրական ընկերակցութիւն մը կը հաւաքէր հիւանդ երեխաներու հանար։ Ինծի ուրախացուց օգնելը այս երեխաներուն, որոնք դժուար ժամանակ կ’անցընեն։ Յուսամ որ կարողացայ ուրախացնել զանոնք Նոր Տարուան առթիւ։
Ցոլին Ճինկօզ
31 Դեկտեմբեր 2024-ին մարդ մը եկաւ ճաշարան ծաղիկ ծախելու համար, որ դրամ շահի։ Ես իրմէ ծաղիկ գնեցի, որ մօրս նուիրեմ Նոր Տարուան առիթով։ Այս վայրկեանին կարկանդակները եկան եւ իմ բաժինս իրեն նուիրեցի։
Անոր հարցուցի՝ ինչո՞ւ մինակ էր Նոր Տարուան գիշերը։ Ան ըսաւ որ պէտք է կեանքը շահէր
ծաղիկ ծախելով։ Ան կը մտածէր Նոր Տարուան համար իր ընտանիքին նուէր մը գնել։ Ես իրեն հարցուցի՝ ինչո՞ւ իր ընտանիքի հետ չէր, ան պատասխանեց ըսելով, որ շատ մարդ կը պտտի փողոցները եւ անոնք դրամ կուտան, որովհետեւ տօն է եւ ժողովուրդը բարի կ’ըլլայ այս օր։ Յետոյ ըսաւ որ պէտք է երթայ. ինծի շնորհակալութիւն յայտնեց եւ ժպիտով գնաց։
Էտի Պաղտասարեան
Ծնունդի արձակուրդին, Կիրակի օր մը Ֆրամբրի (Franprix) գացի ու սանտուիչ եւ ջուր գնեցի մարդու մը տալու համար։
Երբ կը քալէի, 50 տարեկաննոց մարդ մը տեսայ, որ արդեն տեսեր էի ու տուի իմ գնածներս եւ 10 եւրօ, ըսելով «Շնորհաւոր նոր տարի եւ բարի Սուրբ ծնունդ» ֆրանսերէնով։
Շատ ուրախացաւ ու շնորհակալութիւն յայտնեց։
Գայանէ Ջումայեան
Այն հագուստները եւ խաղալիքները, որոնք չեմ գործածեր այլեւս, մայրս կը տանի կազմակերպութեան մը, որ կը կոչուի Secours Populaire։
Այս կազմակերպութիւնը կ’օգնէ օգնութեան կարիքը ունեցող մարդկանց։ Անոնք կը վաճառեն նաեւ ուտելիք։
Ամէն Չորեքշաբթի մարդիկ կուգան Secours Populaire եւ կ’առնեն ինչ որ իրենց պէտք է:
Լուսիկ Եաքար եւ եղբայրը՝ Ռաֆայէլ (6-րդ դասարան)
Դեկտեմբեր 26-ին, Սուրբ Ծնունդէն վերջ մօրս եւ եղբօրս հետ գացի ջուր ու կարկանդակ գնելու անտունիի մը համար։
Անտունին շատ գոհ էր: Ան մեզի ըսաւ, որ շատ երկար ատենէ ի վեր մարդոցմէ նուէր չէ ստացած, յատկապէս Սուրբ Ծնունդի ժամանակաշրջանին։
Ան ըսաւ, որ այսօր արդէն 3 տարի է անօթեւան է եւ պզտիկ շուն մը ունի, այս շունը աղբամանի քովը տեսած է եւ առած է։
Ան նորէն շնորհակալութիւն ըսաւ եւ 10 եւրօ տուինք իրեն, քաջութիւն մաղթեցինք անօթեւանին ու հեռացանք։
Հիւկօ Խանչարեան
Արձակուրդի օր մը, երբ գացի Փարիզ, աղքատ մարդ մը կար, որուն հետ խօսեցայ եւ հարցուցի թէ ինչպէ՞ս էր։ Ըսաւ որ շատ լաւ չէր, որովհետեւ շատ ցուրտ էր: Քիչ մը յետոյ գացի ինքնասպասարան եւ ջուր գնեցի իրեն համար: Ջուրը եւ տաս եւրօ տուի, որպէսզի բան մը առնէ եւ ուտէ:
Տալէս ետք ըսի. «Սուրբ ծնունդի նուէր է»։ Ըսաւ՝ «Շատ շնորհակալ եմ, Աստուած ձեզ օրհնէ»։ Յետոյ՝ «ցտեսութիւն եւ բարի օր» ըսի ու գացի։
Գայանէ Յարութիւնեան
Մօրս հարցուցի, եթէ ունի ծանօթ ընկեր մը, որ մինակ է եւ որ կրնայ հրաւիրել Սուրբ Ծնունդի առթիւ։ Ըսաւ՝ այո, ունի ծանօթ մը, որ կրնանք հրաւիրել Դեկտեմբեր 25-ին, մեր ընտանիքին հետ ընթրելու։
Այդ անձը կին մըն էր։ Ան ըսաւ ինծի, որ իր ընտանիքը այստեղ չ’ապրիր, իր ընկերները զբաղուած են եւ ինք մինակ է այսօր։ Ան շնորհակալութիւն յայտնեց ինծի այս հրաւէրին համար։ Շատ լաւ կին մըն էր։ Ինծի նուէր առաջարկեց, ես ալ իմ նկարչութիւնս եւ տուփ մը շոքոլա նուիրեցի իրեն։
Հարցուց, թէ ինչո՞ւ հրաւիրեցինք զինք, մենք ալ պատասխանեցինք, որ պէտք չէ մինակ ձգել մարդը այս տօնին առթիւ, Յիսուսի անունով։
Նշան Երիցեան
Արձակուրդին, օր մը հետս առի խնձորի հիւթ եւ շոքոլա եւ գացի կանգառ։ Տեսայ մարդ մը եւ երկու երեխայ։ Խնձորի հիւթը եւ շոքոլան տուի իրենց։ Մարդը ինծի շնորհակալութիւն յայտնեց եւ ըսաւ որ շատ բարի տղայ եմ։
14 Յունուար 2025
2 Responses
Ապրիք դուք բոլորդ և ձեր ուսուցչուհին. ինչ գեղեցիկ և հաճելի զգացում է ուրիշները ուրախացնելը. որովհետեւ ՏԱԼ ը հոգեկան մեծ բաւարարութիւն կըպատճառէ տուողին: Կեցցէք դուք:
Շնորհակալ եմ մեր պատանիներուն եւ ծնողներուն անունով։