Ամանորի եւ Սուրբ Ծննդեան առթիւ, աշակերտներով որոշեցինք բարեսիրական արարք մը գործել արձակուրդի ընթացքին, ուրախացնել կարօտեալ մը եւ զգալ՝ տալու ներքին գոհունակութիւնը։
Դպրոցասէրի միջնակարգի բոլոր աշակերտները, 6-էն 9-րդ, արձակուրդէն ետք եկան յիշատակելի փորձառութիւններով։
Ծիծեռնակ կը հրաւիրէ ձեզ անվհատ կարդալու չորս մասով տրուելիք անոնց պատանեկան զգայուն տողերը։
Յատուկ յուզումով կը մատնանշենք ծնողներու ներգրաւումը, որոնք, ինչպէս կը կարդանք, ընկերակցելով իրենց զաւակներուն, քաջալերած են անոնց մարդասիրութիւնը։
ԾԻԾԵՌՆԱԿ
Ալիա Գերեքճեան
Երկուշաբթի, Դեկտեմբեր 30-ին, ժամը 12-ին ես պապայիս հետ խանութ գացի։ Դուրսը տեսայ տկար մարդ մը։ Պապայիս ըսի, որ պէտք է բան մը առնենք, որ ուրախացնենք զինք։
Ուրեմն, գնեցինք կարկանդակ եւ ըմպելիք։ Յետոյ, տուինք պարոնին։ Յուսամ քիչ մը ուրախացուցինք զինք։
Ես ուրախութիւն զգացի, կարծեմ պապաս ալ։
Գաբրիելլա Խաչատրեան
Արձակուրդին, հաց, պանիր, ջուր եւ կարկանդակ տուի աղքատի մը։ Ուրախացաւ եւ ըսաւ. «Շնորհաւոր Նոր Տարի եւ Սուրբ Ծնունդ»։
Մամաս շատ ուրախացաւ, որ ես ասանկ բան կ’ուզէի ընել։ Ես ալ շատ ուրախ էի, որովհետեւ լաւ բան մը ըրեր էի։
Շատ կ’ուզեմ նորէն ընել եւ նորէն մարդ մը ուրախացնել։
Նարեկ Եղիազարեան եւ Էրիկ Կիւլամիրեան
Մենք՝ Նարեկ եւ Էրիկ, միասին գացինք արձակուրդի։ Գնեցինք ջուր, հաց, բրդուճ եւ տուինք անօթեւաններուն, տուինք նաեւ մնացած դրամը։ Ըսինք. «Շնորհաւոր Նոր Տարի եւ Սուրբ Ծնունդ»։
Մենք շատ ուրախացանք, անօթեւաններն ալ։
Անահիտ Մանսուրեան
Արձակուրդին օր մը մայրիկիս հետ Փարիզ գացի։ Դուրսը տեսանք մարդ մը, անօթեւան մը։ Ես եւ մայրիկս իրեն դրամ եւ ուտելիք տուինք։ Երբ կը քալէինք, երեխայ մը տեսանք, մինակ նստած, գացինք մօտը, հարցուցինք որ մայրիկը ո՞ւր է։ Մեզի ըսաւ, որ չի գիտեր։ Ուրեմն օգնեցինք որ գտնէ մայրիկը։
Անօթեւանը շատ ուրախացաւ, ես ալ, քանի որ ուրախացուցի մէկը, որ պէտք ունէր։
Երեխան ալ ուրախացաւ, քանի որ մայրիկը գտաւ։ Ես ալ ուրախացայ, քանի որ իր տեղը չէի ուզեր ըլլալ։
Էմիլի Յակոբեան
2024 Դեկտեմբեր 30-ին ես ծնողներուս հետ գացի Նոր Տարուան վերջին գնումները ընելու։ Խանութին դիմաց աղքատ մարդ մը կար։
Ես ու ծնողներս խանութ մտանք եւ իրեն համար ուտելիք, գլխարկ, ձեռնոց գնեցինք։ Դուրս շտապեցինք եւ ամբողջը տուինք իրեն։
Ան շատ ուրախացաւ, անոր աչքերը կը փայլէին եւ ան շատ շնորհակալ էր։
Ես ու ծնողներս երբ տեսանք անոր ուրախութիւնը, մենք ալ ուրախացանք։ Հայրիկս ըսաւ, որ օրիորդը աղուոր միտք ունեցած էր։
Դաւիթ Յակոբեան
Արձակուրդին ընտանիքով Աւստրիա գացինք, մօրքրոջս քով։ Երկու օր յետոյ, ես եւ մայրիկս կաթօ շինեցինք եւ գացինք խանութ մը։ Հոն կար աղքատ մարդ մը։ Մամաս ըսաւ՝ այս կաթօն տար եւ տուր այդ մարդուն։ Գացի եւ տուի, ըսի. «Շնորհաւոր Նոր Տարի եւ Սուրբ Ծնունդ»։
Ես ուրախ էի, որ տուի։
Ազատ Զատուրեան
Այսօր մայրիկիս հետ խանութ գացի։ Տեսայ անօթեւան մարդ մը։ Հաց եւ ջուր գնեցինք եւ տուինք անոր։ Ըսի. «Շնորհաւոր Նոր Տարի եւ Սուրբ Ծնունդ»։
Ալէն Մարգարեան
Դեկտեմբերի արձակուրդին մայրիկիս հետ խանութ գացի, վրանի տակ ապրող անապաստան մարդոց համար ուտելիք եւ խմիչք գնելու։ Մեր գնածը եւ դրամ տուինք անոնց։ Մեզի շնորհակալութիւն յայտնեցին։
Սթելլա Գապալագ – Պատմութիւն մը
Սուրբ Ծննդեան օրը փոքրիկ աղջիկ մը տունէն դուրս կ’ելլէ խաղալու։ Ան կը տեսնէ միայնակ, տխուր մարդ մը։ Կը փափաքի իրենց տունը տանիլ, Սուրբ Ծնունդը տօնելու իր ընտանիքին հետ, որպէսզի ուրախացնէ զայն։
Կը ճաշեն միասին։ Փոքրիկ աղջիկը նուէրներ կու տայ անոր՝ դրամ, ճաշ եւ հագուստ։
14-15 Յունուար 2025