11 Նոյեմբեր 2022-ին, ՙՆախկին Դպրոցասէրցի՚ ծրագրով մէկտեղուեցանք Դպրոցասէր վարժարանը աւարտած մեր սաներով, զրուցելու համար Ֆեմինիզմի նիւթին շուրջ։ Ստորեւ երկու պարմանուհիներու՝ Սերենայի եւ Սոնիայի հակազդեցութիւնները։
ԾԻԾԵՌՆԱԿ
ՖԵՄԻՆԻԶՄ
Սերենա Քէշիշեան
Ուրբաթ,11 Նոյեմբեր 2022-ին նախկին դպրոցասէրցիներու խումբը հաւաքուեցաւ։ Խօսեցանք ֆեմինիզմի մասին։ Ամէն մարդ տարբեր մօտեցում ունէր։
Իմ կարծիքովս, կիները պէտք է ունենան այր մարդոց հաւասար իրաւունքներ։ Վերջին տասնամեակներու ընթացքին, կարգ մը իրաւունքներ ձեռք բերուեցան, բայց տակաւին շատ հեռու ենք հաւասարութենէ։ Կրնանք բաղդատութիւն մը ընել գործի աշխարհին մէջ։ Կիներն ու այր մարդիկ նոյն ամսականը չունին, նոյնիսկ եթէ հաւասար ճիւղի մէջ կ’աշխատին։ Կարգ մը մարդիկ կրնան այս տարբերութեան պատճառը բացատրել մայրութեամբ, բայց անզաւակ կնոջ պարագային եւս այս տարբերութիւնը գոյութիւն ունի։
Իմ կարծիքովս, ընտանեկան կեանքի մէջ նոյնպէս, եթէ կինն ու այր մարդը կ’աշխատին, պէտք է երկուքն ալ մասնակցին տան գործերուն։ Ընդհանուր առմամբ եւ մանաւանդ մենք՝ հայերս, կը պնդենք, որ տան գործերը միայն կնոջ պարտականութիւնն են։ Բայց համամիտ չեմ այս գաղափարին։ Երբեմն այս պարտականութիւնները մէկ հոգիի վրայ շատ ծանր են։ Զոյգ մը միացած է, որ միշտ օգնեն իրարու եւ չեմ հասկնար՝ ինչո՞ւ այս պարագային չի յարգուիր այս սկզբունքը։
Երբ ամուսնանամ, ես պիտի ուզեմ, որ մեր զոյգը ամէն բանի մէջ օգնական ըլլայ մէկը միւսին։
Սոնիա Պօղոսեան
Ֆեմինիզմի նպատակն է տղամարդոց եւ կանանց միջեւ հաւասարութիւն ստեղծել, որպէսզի կինն ու տղամարդը ունենան նոյն իրաւունքները եւ զարգանալու նոյն հնարաւորութիւնները։ Կանայք պէտք է կարողանան աշխատիլ, եթէ աշխատելու փափաք ունին, եւ պէտք է ստանան տղամարդուն հաւասար աշխատավարձ ։
Կնոջ պէտք չէ վերապահել տուն մնալու դերը միայն. ճաշ պատրաստելու, երեխաները խնամելու եւ տնային գործերը ընելու դերը: Տնային գործերը կատարելու են տղամարդն ու կինը միասնաբար։ Կինը, որ յաճախ տարիներ շարունակ ուսում ստացած կ’ըլլայ, տղամարդուն համար անշուշտ պիտի չ’ուզէ հրաժարիլ աշխատելու կարելիութենէն։ Ան արժանի է իր ճիգին (խօսքը ուսումին մասին է) պտուղը վայելելու։
Ուրեմն, պէտք է ուժ ունենայ եւ ընտրէ թէ ի՜նչ կ’ուզէ ընել իր կեանքի ընթացքին։
17 Դեկտեմբեր 2022