ԴԱՆԻԷԼ ԵՐԻՑԵԱՆ
Դպրոցասէր վարժարան, 6-րդ դասարան
Քրիստիանօ Ռոնալտօ Տոս Սանթոս Ավէյրոն, ծանօթ է Ռոնալտօ կամ Քրիստիանօ Ռոնալտօ անունով եւ CR7 մականունով։ Ծնած է 5 Փետրուար 1985-ին Փորթիւկալի Ֆունշալ քաղաքը։ Ան փորթիւկալացի միջազգային ֆութպոլիստ մըն է, որ կը խաղայ «Եուվենտուս» ՖԱ խումբին մէջ, իբրեւ յարձակող։
Ֆութպոլային մարզաձեւի պատմութեան լաւագոյն խաղցողներէն մէկը կը համարուի։ Միակն է, Լիոնել Մեսսիին հետ, որ հինգ անգամ ստացած է «Ոսկէ գնդակ» մրցանակը՝ 2008, 2013, 2014, 2016 եւ 2017 թուականներուն: Հեղինակ է աւելի քան 770 կոլերու։
Ռոնալտոն լաւագոյն ռմբարկուն է ՈւԵՖԱ-ի ախոյեաններու լիկայի, Եւրոպական բաժակներու, Ռէալ Մատրիտի, Մատրիտի Տերպիի (derby), ՖԻՖԱ-ի աշխարհի բաժակի խաղարկութեան եւ Փորթիւկալի ընտրանիին, որու աւագն է 2007 թուականէն ի վեր։ 10 Յուլիս 2016-ին Ֆրանսայի դէմ տարուած աւարտական յաղթանակով Փորթիւկալի ազգային խումբը դարձաւ Եւրոպայի ախոյեան։
Ան Եւրոպական «Ոսկէ խաղակօշիկ»ի քառակի դափնեկիր է եւ Միշել Փլաթինիի հետ կը համարուի Եւրոպայի ազգերու առաջնութեան պատմութեան լաւագոյն ռմբարկուն։
20 Յունիս 2018-էն ի վեր ի՜նք կը պահպանէ ազգային խումբի եւրոպացի խաղցողի կոլերու մրցանիշը, գերազանցելով հունգարացի Ֆերենց Փուշքաշին։ Մրցանիշ խլելու պահուն Ռոնալտոն ունէր 85 կոլ, իսկ ներկայիս՝ 103։
18 Մայիս 2021